Aitor Francesena surflaria matematikoki gailendu du munduko bi zirkuitutan
Zarautzekoak hiru proba puntuagarrietatik bi irabazi ditu zirkuitu bakoitzean.
Aitor Francesenak sasoi batean jarraitzen du eta garaipenak bildu besterik ez du egiten. Kanarietako Las Canteras hondartzan ospatutako Para Surfingeko Espainiako Koparen barruko txapelketak ez zuen sekreturik izan berarentzat, eta aurten jokatu dituen gainerako nazioarteko txapelketetan ere gauza bera gertatu da. Helburua argia da, berriro munduko txapeldun izatea, iaz bezala, baina oraingoan bi zirkuitu ezberdinetan.
Adaptive Surfing Professionals World Championship Tour 2023 txapelketan Aitorrek lehen bi probak irabazi ditu, azkena ostiralean bertan. Zirkuitu honetan 17 herrialde baino gehiagoko 100 surflari baino gehiagok parte hartzen dute.
Bestalde, AMP Surfak (Surfealari Anputatuen Elkartea) beste zirkuitu paralelo bat antolatzen du, non Aitor Francesena ere nagusitzen ari den. Lehen garaipena Kalifornian iritsi zen, eta bigarrena duela bost egun eskas Jacó hondartzan (Costa Rica). Zirkuitu honetan finalak Kalifornian ospatuko dira urrian edo azaroan eta oraindik baieztatu gabe dago Huntington Beachen edo Pismo Beachen izango den.
53 urterekin ez du erretiroan pentsatzen. Epe luzera olinpikoa izateko erronka dauka. “Gorputzak eta buruak eusten badidate eta surf egokitua azkenean programa paralinpikoan sartzen bada, Los Angeles 2028an egongo naiz lehiatzen eta dena ematen” esan du ‘Gallo’k behin baino gehiagotan.
Iturria: EITB
