Kaiet Iribarne: «Hobe da Euskal Herrian egotea Frantziaren beste puntara joatea baino»

Duela hiru urte, lagun batek prestatu zion bideko bizikletarekin hartu zion gustua Kaiet Iribarnek (Luzaide, 2005) bideko txirrindularitzari. Saliesko (Okzitania) taldearekin hasi zen lehian, gero Baionara joan zen Iparralde taldean sartu ahal izateko, eta sasoi honetan Iruñeko Finisher taldean sartu da, emaitza onen ondorioz. Talde horrekin emaitza onak kausituz geroz, profesionaletara pasatzeko parada eskura luke. Euskal Herrian jokatu diren nazioarteko lasterketa desberdinetan parte hartu du aurten, eta Kanadan podium batera ere igo zen mendiko sailean; Azpeitiko (Gipuzkoa) San Inazio lasterketa ere irabazi zuen iragan irailaren 23an. Ekonomia eta kudeaketa ikasten ari da Baionan.

Maulen bada txirrindula talde bat, eta beste bat Baionan. Zu bien artekoa zara, Uharte-Garazikoa.

Egia erran, ez da besterik; Saliesen hasi nintzen, lagun bat han ari baitzen. Gero, artekoetan, Baionara joan nintzen Iparralde taldean sartzeko. Geroztik han aritu naiz, eta orain Iruñean hasi naiz.

Mendiko bizikletatik bidekora heldu zara.

Mendiko bizikletarekin ez nuen batere lasterketarik egiten, plazerarentzat egiten nuen. Berdin zitzaidan mendian edo bidean aritu, eta egun batez hartu nuen lagun baten bideko bizikleta eta anitz maitatu nuen. Bat erosi eta gero hasi nintzen lasterketan. Mendiko lasterketarik aldiz ez dut ezagutu, egia erran.

Klixea izan daiteke, baina dopinarekin lotzen da usu bizikleta mundua.

Hori da jendeek bizikletaz duten ideia bat, baina hori lehen zen, orain fini da. Denek lotzen dute bizikleta dopinari, baina ez dut soportatzen, ez da egia. Badira hiru urte bizikleta hasi nuela eta ez dut sekula entzun dopinaz mintzatzen; deus, zero! Kirol kontrolatuena da, gainera.

Hori pentsatzen dute bizikletarik egiten ez duten jendeek, baina zinez talde lana da. Egin arte, jendea ez da ohartzen. Bi aldeak ditu; bai, kilometroak bakarrik egiten dira eta ez bazara ontsa zure bizikletan zu zara ontsa ez dena. Baina irabazteko, lasterketan, talde lana da inportantea. Gure taldean nehor ez da abian bakarrik.

Talde bat profil desberdinez osatzen da orduan? Elkarren osagarri zarete?

Talde batean batzuk entseatuko dira irabazten etapa zabalak, badira eskalatzaileak, eta usu liderrak dena egiten du. Lasterketa guztietan liderra biziki babestua da, beste guztiak haren inguruan dira. Ura edo jatekoa behar badu, autora beste norbait jautsiko da, adibidez.

Guk pixka bat bai, baina momentuko ez gara biziki espezializatuak. Badira lider tipi batzuk, baina denek badute beren xantza.

Iparralde taldea zinez Ipar Euskal Herriko talde bat da ?

Egia erran, ez biziki, zeren eta badira Ipar Euskal Herrikoak eta Hego Landetakoak ere: bost talde biltzen ditu talde handiago eta hobe bat egiteko, maila hobearekin; lasterketa ederragoak egiteko, gure eskualdean ez baitira lasterketa garrantzitsuak. Talde horretan eraman gaituzte Hego Euskal Herrira lasterketa ederren egitera, han biziki antolatua baita eta maila ona baita. Laguntzen du talde handiago bat izaten, klubak bilduz sosa biltzen baita, ene ustez, bide gastuak pagatzeko-eta ere. Frantziako Estatuan nahi bagenitu lasterketa ederrak egin, asteburu oroz behar litzateke Bretainiara joan, edo han gaindi, han baitira lasterketa ederrak.

Erran nahi du hemengo txirrindulari batentzat interesgarriago dela Euskal Herrira so egitera Frantzia aldera baino?

Bai, arrunt! Hurbilago eta maila biziki gora denez, hobe da Euskal Herrian egotea Frantziaren beste puntara joatea baino.

Zuk bi urte iragan dituzu bideko bizikletarekin eta badituzu lasterketak irabaziak.

Kirol munduan izan naiz beti, futbolean eta… Eta gero lasterketetan xantza ere sartzen da.

Iruñeako Finisher taldean hartu zaituzte. Amateurretan goi mailako taldea dela erran daiteke?

18 urterekin artekoen urteak bukatu ditu, eta orain edo profesional pasatuko gara emaitza biziki onak baditugu, eta, bestela, hor egoten gara. Lau urte baditugu profesional pasatzeko; bestela, fini.

Profesional bilakatzea duzu helburu?

Bai, eta gure taldean ontsa dena da ekipo profesional baten erreserba dela. Ona bazara, badakizu baduzula talde bat hortxe berean; urrun da, halere, jauzi handia da. Baina zerendako ez!

Erran duzu beste kiroletan ere ari izan zarela beti. Orain dena bizikleta izanen da?

Duela hiru aste hasi garela berriz ere entrenatzen eta denetarik egiten dugu: igeriketa, muskulazioa, bizikleta, mendia… baina gero dena bizikleta izanen da, bai.

Ikasketak eta entrenamenduak segitzea kausitzen duzu?

Momentuko, bai, baina lan pixka bat gehiago egin beharko nuke ikasketetan.

Erran nahi du ikasketei inportantzia ematen diezula?

Lehenik, ikasketak! Hori argi dut, eta beti hori errana izan zait familian: lehenik, ikasketak, eta gero, kirola.

Euskarak zer presentzia du ibili zaren talde desberdinetan?

Iruñeko entrenatzailea enekin euskaraz ari da beti. Lasterketetan, Hego Euskal Herrian ari baikara, euskara denetan da, egia erran: lasterkarien artean, entrenatzaileen artean… Iparraldea taldean baziren euskaldun batzuk baina ez zen euskaldun giro oso bat.